musicaire

Moudernita


Eh, Marius, ai vist toun drole , avié uno casqueto em'un'alo de trento centimètre.
Perdequé l'avié messo d'à rebous ?
Avié de braio que semblavo que i'avien dounado, devon pas ié sarra l'embouligo.
E deques acò, si soulié arribavon à si geinoui.
Moun paure parèi qu'es la mode, l'autre jour, l'aviéu pas recouneigu, èro davans lou poulaié, d'un pau mai ié mandave un cop de fusiéu.
Estripo si braio, sa pauro maire avié vist si braio estrassado au geinoui, voulié li pedassa, moun drole ié levè l'envejo.
Saben plus coume faire, vòu plus ana à l'escolo, vòu plus travaia la terro, parei qu'acò fai "plouc", aro fau estre "chebran".
Passo li niue deforo, lou matin pau plus s'auboura, manjo pas rèn. Pamens fai d'ecounoumio, achato plus li cigaleto en paquet. Li roule èu-meme. Sabe pas ounte trobo lou taba, te fai un fumaras ! Lou chin vòu plus resta dins l'oustau e lou cat resto escoundu souto lou bufet.
Nous aduguè uno chato i pèu blu, avié un anèu dins lou nas, crésiéu qu'èro uno estra-terrestro, pode pas te dire se parlavo lou franchimand, disié" Ok, bof, oh la chetron" ( acò en me vesènt).
L'autre jour lou gàrdi-campestre me l'aduguè à l'outau, aquèu couiounas avié escrit "NTM" sus li muraio de la coumuno emè de pinturo rouge en boumbo.
Perdéqué faire ?
Ah! Acò es l'Inne. Aqueli gènt que frequento soun pas coume nautri, dison" Nique Ta Mère", "Nique la police".
Acò's pas poussible!
Aquelo pinturo se dis "TAG", se sariè pas desvouloupa sé un couioun de Ministre de la Culturo avié pas dit qu'acó èro d'art e dóu grand.
Digo Marius, te souvène qu'à Laudun se débanè la festo de la roumanita, li gènt poudien visita lou Camp de Cesar e li vestige Rouman , te rendès compte se dins quauqui siècle li gènt descurbisson de"TAG", van se demanda s'èro pas lis obro de l'ome dõu tèms di baumo!

Daniè Fauvelet