musicaire

Lou lavaire de vitro
(Tira de l’armana prouvençau de 1992 texte de Rouland Cousta )


I’a quàuquis annado d’acò, fasiéu d’estùdi à l’universita de z-Ais, e aviéu, coume li jouine de moun age, besoun d’argènt. Ere bèn oublija de travaia pèr paga mi libre e quàuqui pichòti causo. La bourso de mi gènt èro deja proun vuejo pèr qu’anèsse pas encaro ié demanda de s’esquicha un pau mai. Aquest an que vous parle , travaiave dins uno librarié que se capitavo sus lou Cous. Ah ! Lou Cous ! L’endret requis ounte li desoubra, lis estrangié o li simpli vacancié se tirasson au cafè e pantaion de viéure touto sa vido en escoutant la musico de Mozart o bressa pèr la cansoun cascaianto di font.
Mai avans vuech ouro, lou matin, n’ia pas forço d’aquéli sounjo-fèsto ! A despart di gènt que travaion o que van à si burèu, se ié rescontro pas gaire de mounde. E es ansin que prenguère l’abitudo de vèire lou lavaire de vitro.
Segound l’ouro qu’arribave, èro uno o dos veirino avans la librarié. Tout acò semblavo escacha coume un papié de musico. Se lou bus que me menavo èro aplanta au fiò rouge, à l’intrado de la Routoundo, ère segur que moun lavaire sarié en trin de neteja li vitro de la farmacio, à coustat de la librarié, e se lou bus avié ges de destourbe, de segur l’ome fretavo à la Brassarié di Dous Ami, un trentenau de pas plus bas.
Pau à cha pau, me venguè famihié, e tre lou vèire, me semblavo que la journado poudié coumença, que li causo èron en plaço.
Arribave toujour bèn avans que se durbiguèsse la boutico. Ero pas pèr faire de zèle, mai poudiéu pas faire autramen. Lou bus, mau-grat sis ana-veni noumbrous, avié d’ouràri que marchavon pas bèn emé li miéu.
Ansin, chasque matin, aviéu de perdre vint o vint-cinq minuto avans de vèire se leva la porto ferrado dóu magasin.
Un cop restave sus un banc pèr regarda li gènt qu’anavon vers soun pres-fa : pichots emplega de burèu fasènt la bèbo pèr parèisse serious, o risoulejant coume de niais, sounjant belèu i vacanço o à la dimenchado à veni… Un autre cop, m’assetave à la terrasso di Dous Ami e beviéu un cafè, un pichot cafè, qu’anave pas manja lou benefice pamens ! Passave moun tèms à bada l’espetaclo dóu Cous. Mai un matin coumencère de parla emé lou lavaire.
Avié fa coume iéu, me couneissié de m’avé vist chasque matin e me demandè :
- Es vous que travaias à la librarié ?
- Vo !
- Acampas de forço avans de coumença ?
- Pas eisatamen, mai ai de perdre un pau de tèms, e coume tout lou sanclame dóu jour siéu de dre, ai ges d’envejo de barrula o de me passeja.
- T’agrado, aquéu mestié ? ( Ero maugrabin, e poudié pas s’empacha de chanja soun biais de parla e de tuteja ; ço que me geinavo pas ;)
- Vo, faguère, es pas marrit, mai, de-bon, es pas moun mestié. Siéu estudiant e ai besoun de sòu ai cerca d’obro , e ai trouva’quelo ! Auriéu pouscu neteja li vitro, parié.
- Oucho ! De que dises ? Li vitro coume iéu ?
Pareissié sousprés e urous de ma responso. Bessai que ié semblave plus proche d’éu…sabe pas.
-Vo ! Segur, auriéu pouscu.
-Es fichant !... Es pas un travai ! degun fai atencioun en rèn…De cop que i’a, siés en trin d’eissuga la vitro, e zóu ! n’en i’a un pèr veni empega sa man just à coustat, sus l’escampo que regardo ço que i’a dins la veirino…E li pichot, noun ? Emé si det pegous que li maire ié dison rèn… Poudrien espera que siguèsse plus aqui… mai pos courre…. S’en fouton.
Parlavo, mai countuniavo soun obro e s’atenciounavo en ço que fasié.
Dèu èstre crebant, diguère, de neteja, grata, essuga…Devès n’en agué plen li bras à miejour…
-A la debuto, vo…après, emé l’abitudo ! Li bras marchon soulet.
Risié, e d’efèt, marchavon soulet. Venié d’acaba sa veirino e sènso relàmbi, me saludè d’un signe de la man e s’en anè, soun cavalet sus lis esquino, vers la boutico d’à coustat ounte recoumencè.
Pausè soun cavalet, ié mountè, fretè la vitro d’en-aut, la rinsè, baiè dous cop de rascladouiro, davalè, e zòu mai ! La vitro d’en-bas. Mounta, freta, rinsa, rascla, davala, acò s’anavo perlounga enjusqu’à la mié-journado pèr lou mens.
Vuech ouro piquèron, paguère moun cafè e anère chabi mi libre. De la journado, ié pensère plus, i’a toujour de mounde dins la librarié en juliet, e aviéu gaire de tèms pèr sounja is autre. Mai à parti d’aqui, lou matin, se saludarian d’un signe o d’un mot.
A la debuto d’avoust, parlerian encaro ensèn :
-Oh ! Coulego ! diguère, as freta, sas ! Es plus’no vitro, es un mirau ! Es pèr te regarda ?
-Eto ! Quand me vese bèn, m’en vau.. Lou patroun dis toujour qu’un lavaire passo soun tèms à se faire pòu. Quand se vèi, s’en vai.
E risié acò disènt, e iéu tambèn.
Quatre o cinq jour passèron avans que parlessian encaro un moumen ; Mai aqueste cop, se semblavo qu’avié lou nègre :
-Sabe pas ço que se passo, l’èr es chanja . Fau freta qu’es pas poussible. E pèr lou cop, es pas eisa de se vèire…à miejour, sarai fres…sabe pas ço qu’an fichu, mai de tout segur i’a de bèlli salouparié dins l’èr.
Quand changè d’endré, regardère li vitro de la farmaciò, èron propro coume un anèu… Dous jour passèron encaro. Memo causo. Roundinavo que noun sai.. D’istint, anère m’aplanta davans la veirino de la librarié avans qu’arribèsse . Veguère rèn d’anourmau. Emé lou det, à la chut-chut, fretère la vitro, mafisto ! èro pas bèn salo ! Diguère rèn pèr pas ié tira peno.
Lendeman, email lou bus siguèsse un pau en retard, moun ome èro panca arriba. Ero plus bas sus lou Cous. Fasié la bèbo !
-Hòu ! faguère, coume siés ? De que i’a que marcho pas ? n’en fas uno testo ?
-Vo ! segur ! me vese pas !
-E iéu, me veses ?
-Tu, vo !...iéu aqui, noun !
-Aquelo empego ! as marcha au soulèu ? Siés un pau fatiga ?
-Cresès ?
-Senoun, fau te faire vèire !
-Vau i’ana après moun travai.
Lou jour d’après, travaiavo.
–Coume vai, de que t’a dit lou medecin ?
-Rèn… Me diguè de vèire un ouculisto !
S’en anè, tirassant soun cavalet.
Li jour d’après, quand pounchejère sus lou Cous, Radouane ( qu’èro soun noum) istavo pas mounte pensave. Avié cinq veirino de retard. Uno semano plus tard, avié panca coumença li davanturo dóu Cous. Es aqui que l’anère trouba :
- Hòu ! Radouane ! E alor ? De que t’a di l’especialisto ?
- -Que tout vai bèn ! Vese lou jou, vese la niue,…mai eici regarde dins la vitro, ié siéu pas !
-Pos pas resta ansin.
Coume , Ai ges de provo ! e tu meme, me veses !
Restère dous jour sènso lou vèire, e lou tresen, coume arribave sus lou Cous, entreveguère moun lavaire.
-Tè ! la bono souspresso !
Ero pas Radouane. Ero un autre Maugrabin que ié dounavo un pau d’èr. M’aprouchère de l’ome e ié demandère se couneissié Radouane.
-Vo, respoundeguè, lou couneisse.
- E mounte es ?
-Ma fisto ! fai plus lou mestié. Despuei que counèis aquelo chato, es malaut, es fòu, dis que se vèi plus dins la vitro… de couiounige acò ! Se vòu marida. Se faire francès. Un renegaire !
- Ah ! bon diguère. Eh ! bè, à se revèire !
Belèu sièis mes après, rescountrère d’asard Radouane, lou pèu courtet e fres coume un gardoun. Ero pas soulet, uno chato de soun age à pau près l’acoumpagnavo.
-Bonjour ! me diguè…me recounèisses ?
- Segur, Radouane ! Coume vas ?
- Bèn ? Siéu à l’armado, e te presento Catarino. Se maridan dins quauqui jour.
-Bèn countent.
-Pos veni à la fèsto, se vos…Aro, siéu coume tu, siéu francès…e siéu urous.
E quand se regardan dins la vitro, se vesèn tóuti dous… Ié siéu, aro !

Parlavo en risènt.
Subran, veniéu de tout coumprendre.