musicaire

Lou Pantai dessena e la resoun

Coume poudiéu m'imagina, iéu que siéu nascu en milo nóu cènt vinto tres de faire un pantai parié ?
Erian en milo nóu cent sege, aviéu vint an e fasiéu la guerro de 14-18 dins uno trencado à Verdun, autour de Douaumont! La trencado èro pleno de soudard en tengudo blu ourizoun, vesti de la capoto, li braio enviroutado de moletièro, lou casco sus la testo, lou fusiéu Lebel i ped.
Lis alemand à peno escoundu dins la trencado en fàci, à belèu tres o quatre cènt metre. Esperavian ! Arribè pèr nous parla un ajudant proun enfiouca, nous diguè_:
_Voyez les gars, la tranchée là-bas, nous allons en, chasser les "boches" qui l'occupe, nous repousserons l'ennemi, tranchée par tranchée,…jusqu'à Berlin s'il le faut! Le barrage d'artillerie nous protègera, ensuite nous foncerons et viderons les lieux, évidemment nous aurons de la casse , on ne fait pas d'omelette sans casser des œufs, mais ne vous en faîtes pas, l'Etat Major a promis que tous ceux qui tomberaient seraient remplacés dès le lendemain. Allez! Dites comme moi, du fond du cœur…"ON LES AURA" !
Eù nous lou diguè mai fort que nous autri…
"ON LES AURA"! mancavian de courage! Es alor qu'aduguèron nosti bidoun de dous litre de vin e un quart de gnolo à chascun, de gnolo à 60°? Beguerian de "ganche" de vin e proun de gnolo. Nous avien di pèr l'aigo'ardent de n'en garda la mita, e l'acaba au moumen de l'ataco!
Plan planet ansin retroubavian tóuti lou goust de se batre. Uno calour m'enfioucavo lis auriho, vesiéu pas lou moumen de passa à l'acioun. De tóuti nosti forço se meteguerian à brama:" On les aura, on les aura!"
E aquelo artiharié que tardavo!.
Vaqui pas que nous arribè un centenau de gendarmo, de proufessiounau….mai n'èro pas un renfort, venien pas pèr nous ajuda. Nous faguèron boufa dins un baloun, un countourole d'alcol que fuguè pousitiéu pèr tóuti lis ome de la trencado: óuficié, souto-óuficié coumprés. Nosti libret militàri fuguè supremi catecant!

Interdicioun de faire la guerro e lou soudard pèr la durado de cinq an! Un coumandant di gendarmo nous tratè d'ibrougno:" Vous n'avez pas honte, la patrie avait mis son destin entre vos mains, ah! Ce n'est pas avec des espèces d'alcooliques comme vous que nous reprendrons l'Alsace et la Lorraine à l'ennemi! Rentrez chez vous bande de bons à rien!"
Es aqui que me revihère d'aquèu pantai dessena. Dins ma testo repassave l'istòri; plan–planet lis idéio revenien claro e… loungamen reflechiguère./


Bon Diéu! Es verai, nous l'an proun di nosti gènt, e mai l'aven vist dins mli escri. Fasien bèure forço vin e gnolo i soudard avans lis ataco, lis alemand? De segur fasien parié emé la biero e lou schnapps . e pamens èro ben la destinado d'un païs qu'èro dins li man d'ome empregni d'alcol! Alor que aro es forço enebi de mena vosto veituro s'avès un pau caressa la divo boutiho o begu un parèu d'aperitiéu! Pamens pouden pas dire que nosti grand ancian, soudard èron abestiassi! Belèu èron de subre-ome!
Segur èron mai soulido di ner, quand pensas que vuei un rèn vous desrenjo…


De gènt vengu de l'autre bout an fa basti au nostre. L'avès belèu legi coumo iéu dins lou journau, se plagnon dóu brut que fan li cigalo…..! la joio de nostis estiéu ! d'autri es lou branle di campano, lou balalin–balalan lis enfeton. Dire que d'autri fes à l'encountrado èro la vido dóu païs que li campano espremissien? Lis angelus, li maridage, li messo, li clas èron bèn li novo de la ciéuta ?



A coustat d'Uzes , lou proumié magistra d'un vilage es pas countent: de gènt ,( d'euroupen), volon pas d'uno escolo à pourtado de soun oustau
( lou brut que fan lis enfant li desrenjarié). Eilà es un gau que canto sa joio de grand matin que reviho li gènt pamens proun aliuencha.



Un TGV que passo à mai d'un kiloumètre, soun brut es insupourtable, avès legi li plagnun coume iéu….coume fasien li famiho di gardi-barrièro dóu camin de ferre, qu'abarissien sis enfant ras dóu passage di trin?
Parlarai pas de l'escolo ounte fau pas puni ni charpa lis enfant qu'acó li destourbo! Es ansin poudriéu countunia li eisemple. Belèu me troumpe, sara pas lou proumié dóu cop.

Pense que nosti cercaire que volon gari de malautié terriblo, poudrien assaja de trouba lou biais, lou remedi, pèr nous espargna lou couiounige uman. Sariéu un di proumié à me faire sougna. Ansin i'aurié plus ges de guerre, de meichanceta, gaire d'aucident, mai de touleranci e de fraternita. S'acò sarié pas lou bonur, ié ressemblarié
Ramoun FABRE