musicaire

Que 2008 vous fague joio
Que siègue pèr vous tóuti
Uno annado flòri
Beluguejanto de bounur e de santa.

Lis Ami de la Lengo d'O
vous souveton uno bonno annado
acoumpagnado de forço autro.

Souvetan qu'aquelo annado siegue pèr touti uno annado ounte la culturo e la lengo de prouvenço maugrat li garouio , restara dins nosti pensado, assajan de manteni aquelo bello lengo parlado pèr nosti rèire, pouden counserva noste culturo e tamben pas passa pèr de "dinausore"poudes legi la pouesio seguento qu'ai escrito i'a quauqui tèms:


RENEISSENÇO

Prouvençau, ounte sias, foro dis assemblado,
Dis assouciacioun, dóu fouclore d'estiéu.
Es bessai lou moumen, l'ouro es arrivado,
De ranima lou fió dóu parla agradiéu.


Escoutas li media escampa de cansoun,
Vengudo d'Anglo-terro i bouco de bramaire,
Que degun li coumprènd, baias-me la resoun
D'aquel enjouliamen pèr li bèu counquistaire.


Pamens d'autris endré an sachu manteni
Lou parla regiounau, e cadun lou mestrejo.
Prouvençau, anen, dau ! Se sian pas esvani,
Dóu parla dis ancian nous levaren l'envejo.


Li menaire de vuei volon banalisa
Lou parla, la mounedo, li lèi e li frountiero.
La lengo es lou mejan pèr se moubilisa
E faire l'unita, ansin qu'uno preguièro.


Voulen vièure au païs : La "revendicacioun".
Pamens, abandounan nosto bello prouvenço.
Pèr aganta d'ounour, agué de proumoucioun,
Sian priva de soulèu despiéi nosto jouvenço.


Se d'asard s'entournan, vengu la retirado,
Nous faudra subre-tout forço d'umelita.
D'estrangiè benurous, sus li rouino leissado,
An basti d'oustau nóu, e nous an remplaça.


Miejournau de tout bord, dins l'Europo deman,
Assajan de sauva lou gaubi de prouvenço.
Lou mesclun fai mestié, e, la man dins la man
Refasen l'unita, sara....la RENEISSENÇO.

Daniè Fauvelet